لو جاي فى رجوع انساني بقلم ايمان شلبي
اتنهد وهو بيحط أيده في جيبه وبيتكلم بهدوء:
- اولا انا اسف جدا اني مسكت ايدك
ثاني حاجه انا مش فاهم اللي حصل ولو مش حابه تحكي انا مش هسألك انا بس حسيت انك محتاجه مساعده واني جيت في الوقت المناسب عشان كده انا جاريتك في الكلام
ثالث حاجه متحطيش وشك في الأرض انتي معملتيش حاجه اكيد اللي عملتيه ده كان رد اعتبار معرفش من مين فيهم بس الموضع ملهوش تفسير غير كده،ومتقلقيش الموضوع هيفضل سر بيني وبينك محدش هيعرف اي حاجه ولو حابه نكمل في اللعبه انا معنديش اي مانع
ولو حابه اختفي ومتشوفنيش انا برضو معنديش مانع القرار قرارك
كلامه صدمني حرفيا
رفعت راسي واتقابلت عيوني في عيونه اللي بتلمع مع اشاعه الشمس اللي نازله عليها وكأن وجود الشمس بيرسم لوحه فنيه لشخص بكاريزمته وهدوء ملامحه
قلبي دق بشكل غريب وانا ببلع ريقي وبقول پخوف:
- ا انا اسفه جدا ا اسفه أني....
قاطعني وهو بيشاولي بأيده:
- هششش متتأسفيش انا مش زعلان وبعدين ياستي هو حد يطول يبقي عنده خطيبه قمر زيك
رفعت حاجبي وانا بسأله بحزم:
- افندم ؟!
بلع ريقه بتوجس:
- ايه بهزر يارمضان مبتهزرش!
- عن اذنك
قولتها وانا مكشره وبعدت ولسه همشي لقيته بينادي
- لوتتتتفي استني يالوتفي
كتمت ضحكتي وانا يكمل طريقي من غير ما ارد عليه ووقفت اقرب تاكسي وركبته
كنت عماله اضحك طول الطريق علي طريقته وهو بيقلد رجاء الجداوي بالظبط
حتي السواق افتكرني مجنونه وهو كل شويه يبصلي ويضرب كف فوق التاني ويقول
- لا حول ولا قوه الا بالله ربنا يشفي
- ايه يااسطي انت جاي تتوب هنا ولا ايه ؟
- والله يابنتي الواحد من كتر ما بقي يشوف مجانين في حياته بقي يدعيلهم بالشفاء
ضحكت وانا بأكد علي كلامه:
- عندك حق والله ربنا يشفيهم
هو بخفوت:
- ويشفيكي زيهم
قفلت عيني نص قفله وانا ببصله بتحذير:
- بتقول ايه ؟!
ارتبك وهو بيبلع ريقه:
- هه لا مبقولش يابنتي
كتمت ضحكتي وشويه ووصلنا ونزلت دخلت الشغل
قربت مني واحده من صحابي وهي بتاكل لبان وبتمشي بمياعه وعلي وشها ضحكه صفراء زيها
- ياساتر استر يارب اتخصملي كام المره دي
